Қырғызстанда "дауыс сатып алуға қатысты" 9 қылмыстық іс қозғалды
Жогорку Кенеш депутаттарын сайлау науқаны кезінде "дауыс сатып алу бойынша" 9 қылмыстық іс қозғалды. Бұл туралы Қырғызстан ішкі істер министрлігінің баспасөз қызметінің жетекшісі Сұлтан Макилов 30 қарашада хабарлады.
Осы істер аясында 12 адамға айып тағылған. Қылмыстық істердің бесеуі - Бішкекте, екеуі Шуда және тағы екеуі Жалалабад облыстарында тіркелген.
Құқық қорғау органдары мен орталық сайлау комиссиясына "сайлау заңнамасын бұзу" туралы 256 хабарлама келіп түскен.
Бұған дейін орталық сайлау комиссиясының мүшесі Әбдіжапар Бекматов кандидаттарға, олардың туыстарына және үгітшілерге "үгіт-насихат кезеңінде" заңды бұзғаны үшін 700 мың сом айыппұл салынғанын хабарлаған болатын.
Сайлау учаскелері 30 қарашада сағат 8:00-де ашылды, ал дауыс беру сағат 20:00-ге дейін жалғасады.
Жогорку кеңеш биыл 25 қыркүйекте өзін-өзі таратты, ал президент Садыр Жапаров мерзімінен бұрын парламент сайлауын 30 қарашаға белгілеген.
«Президентті және парламент депутаттарын сайлау туралы» конституциялық заңға сәйкес, елде 30 сайлау округі құрылды. Енді әр сайлау округінен үш депутат сайланады, олардың бірі әйел болуы керек, немесе екі әйел болса, біреуі ер адам болуы керек.
Сайлау елде парламенттің рөлі әлсіреп, оппозицияны қудалау күшейген тұста өтіп жатыр.