Журналист Лұқпан Ахмедияровтың Facebook парақшасы өшірілді
Тәуелсіз журналист Лұқпан Ахмедияровтың Facebook-тағы парақшасы өшірілді. Бұл жөнінде “Республика” басылымы және құқық қорғаушы Бақытжан Төреғожина хабарлады.
“Республиканың” жазуынша, ол аккаунты өшірілмей тұрып, қорғаныс министрлігінен біреулердің хабарласып, “әскердегі сарбаздардың өлімі мәселесін қозғамау жөнінде” ескерткенін айтып, жазба жариялаған.
“Қорғаныс министрлігі қаза болған сарбаздар туралы ақпаратқа қалай реакция білдірді. Кеше “Просто журналистика” YouTube-арнасында “Долг РодинЫ" атты деректі фильм шықты. Фильм шықпай тұрып бірнеше күн бұрын маған бұрынғы оқушым (институттан кейін мен ауыл мектебінде төрт жыл мұғалім болып істегенмін – Л.А) хабарласты. Сол бұрынғы оқушым қорғаныс министрлігінің Батыс Қазақстан облысындағы бөлімінде істейді. Оның сөзінше, “министрліктегі ірі тұлға Лұқпан Сайлауұлынан әскер тақырыбын шайқамауды сұраған” деп сайт Ахмедияровтың жазбасынан үзінді келтіреді.
Оның Facebook-та бірнеше парақшасы бар. Деректі фильм жарияланған парақшасы жабылған.
Сайттың жазуынша, бірнеше күн бұрын Ахмедияров ақпарат министрлігінің өкілі Михаил Комиссаровтың "Республика" сайтын бұғаттау себебі туралы видеомен айтқан пікірін де жариялаған.
Қорғаныс министрлігі бұл оқиғаға ресми түрде түсініктеме бермеді.
Кейінгі кезде белсенділер мен журналистердің желідегі парақшаларының бұғатталуы жиіледі. Бұған дейін журналист Вадим Борейко мен Асхат Ниязовтың Instagram парақшаларындағы жазбалар жойылған еді.