Мајката на загинат од настрешницата во Нови Сад продолжува со штрајкот со глад
Дијана Хрка, мајката на Стефан Хрка (27), кој загина на 1 ноември 2024 година кога се урна настрешница на главната железничка станица во Нови Сад, по 11 дена штрајк со глад во Белград изјави дека ќе продолжи со протестот сè додека не бидат исполнети нејзините барања.
„Обвинителството мора да почне да си ја работи својата работа. Знаете ли колку луѓе не беа сослушани во случајот со настрешницата? Мора да ги сослуша сите. Сите одговорни мора да бидат гонети, бидејќи помина една година“, рече Хрка пред медиумите на 12 ноември.
Таа додаде дека стои зад другите барања што ги постави на 2 ноември, кога го почна штрајкот со глад во близина на зградата на српскиот парламент - властите да ги ослободат студентите уапсени за време на демонстрациите и српскиот претседател Александар Вучиќ да распише избори.
„Но, тој нема храброст да го стори тоа. Никогаш не сум видела поголем кукавица од него“, рече Хрка.
Денеска за првпат по 11 дена била посетена и прегледана од екипа на Брза помош бидејќи не се чувствувала добро.
„Ако продолжам да се чувствувам слабо, ако мојот крвен притисок продолжи да биде низок, ќе се согласам на инфузија. Но, нема да се откажам, ќе останам до крај, додека правдата не биде задоволена“, рече Хрка во обраќање до медиумите.
Никој не е прогласен за виновен една година по падот на настрешницата при што 16 лица загинаа, а едно лице беше тешко повредено.
Обвинението во истрагата за кривична одговорност, во кое е вклучен и поранешниот министер за инфраструктура Горан Весиќ, е во Вишиот суд во Нови Сад.
Судот треба да го потврди или да го отфрли обвинението.
Истрагата против 14 осомничени за корупција, што потенцијално доведе до уривање на настрешницата, ја води Јавното обвинителство за организиран криминал во Белград.
Во јули, Вишиот суд во Нови Сад донесе пресуда со која ги обврзува српското претпријатие за железничка инфраструктура и државата да платат надомест за душевната мака на четири лица поради смртта на нивните блиски. Пресудата треба да биде потврдена од Апелациониот суд во Нови Сад за да стане правосилна.
Трагедијата во Нови Сад се случи на 1 ноември 2024 година, четири месеци откако зградата на станицата беше официјално отворена по тригодишна реконструкција. Оттогаш, во Србија се одржуваат континуирани протести, предводени од студенти во блокада, барајќи одговорност од владата предводена од Српската напредна странка (СНС).