Татарстанда 14 сентябрьдә узачак сайлауларда бюллетеньнәр автомат саналачак
Татарстанда 14 сентябрьдә узачак сайлауларда 44 участокта сайлау бюллетеньнәрен эшкәртү комплексларын куллану планлаштырыла. Бу хакта республика Үзәк сайлау комиссиясе рәисе Андрей Кондратьев хәбәр итте. Аның сүзләрен ТР Үзәк сайлау комиссиясе матбугат хезмәте китерә.
Мондый җайланмалар гадәттәгечә меңнән артык сайлаучы теркәлгән участокларда – Казанда, Чаллыда, Түбән Камада, Әлмәттә, Яшел Үзәндә, Бөгелмәдә, Алабугада, Лениногорскида һәм Чистайда кулланыла.
Кондратьев билгеләп үткәнчә, сайлау бюллетеньнарын эшкәртү комплексын куллану тавышларны санаганда кеше факторының йогынтысын киметергә мөмкинлек бирә һәм мәгълүматларны «Сайлаулар» дәүләт автоматлаштырылган системасына тапшыруны тизләтә.
Комплекслар һәр бюллетеньнән мәгълүматны автомат рәвештә укый торган сканерлар белән тәэмин ителгән – җайланма берьюлы бер бит кенә кабул итә. Шулай ук сайлау бюллетеньнәрен эшкәртү комплекслары дөрес рәсмиләштерелмәгән бюллетеньнәрне һәм әлеге участокка карамаган документларны кире кага.
Сайлау комиссиясендә ассызыклаганча, җиһаз тулысынча автоном, интернетка тоташтырылмаган һәм киберһөҗүмнәрдән ышанычлы саклана. Хәтта электр энергиясе сүнгән очракта да система бөтен мәгълүматны саклый. Тавыш бирү тәмамлангач, сайлау бюллетеньнәрен эшкәртү комплекслары автомат рәвештә нәтиҗә ясый һәм беркетмәне бастыра.
Исегезгә төшерәбез, Бердәм тавыш бирү көнендә Татарстанда Республика Рәисен сайлаулар, Мәләкәс округы буенча Дәүләт Советына өстәмә сайлаулар һәм җирле үзидарә органнарына 7,5 меңнән артык депутат сайлаулар уза. Сайлау участоклары 7:00-20:00 сәгатьләргә кадәр ачык булачак.
Билгеле булганча, «Бердәм Россия» партиясе республика Рәисе сайлауларына хәзерге Татарстан лидеры Рөстәм Миңнехановны тәкъдим итте.