Ресей соты төрт хакерді бес жылға бостандығынан айырып, іле-шала босатып жіберді
23 маусымда Ресейдің Санкт-Петербург қаласында сот халықаралық REvil хакерлік тобының төрт мүшесіне үкім шығарды.
Ресейде оларға төлем жүйелерін заңсыз пайдаланған және зиян тигізетін бағдарлама таратқан деген айып тағылған еді. Осы қылмыстары үшін әрқайсысы бес жылға бас еркіндігінен айырылды, деп жазды "Коммерсантъ" газеті.
Сот айыпталушылардың бірі Андрей Бессоновтың 2020 жылы шыққан екі BMW көлігін, 51,8 миллион рубль және 497 мың АҚШ доллары тәркілеу туралы шешім шығарды. Ал Дмитрий Коротаевтан 2019 жылғы Mercedes Benz C200 көлігі тәркіленді. Ол екеуімен бірге Михаил Головачук пен Роман Муромский де сотталды.
Үкім жарияланғаннан кейін барлық айыпталушылар сот залында босатылды, өйткені сот олардың тергеу абақтысында өткізген уақытын жаза мерзімімен теңестіріп, оларды босатуға пәрмен берді.
2021 жылдың аяғында хакерлердің ұсталуына АҚШ билігінің ресейлік кибершабуылшылардың әрекетін тоқтатуды сұрауы түрткі болған еді. Сол кезде Ресей мен АҚШ президенттері – Владимир Путин мен Джо Байден арасындағы тікелей келіссөзден кейін хакерлер даркнеттен ізім-қайым жоғалып кеткен, кейін оларды Ресей федерациясының қауіпсіздік қызметі (ФСБ) ұстаған.
АҚШ-та REvil тобын ондаған мың компанияға жасалған шабуылдарға, соның ішінде АҚШ-тағы Colonial Pipeline мұнай құбырына және Бразилиядағы әлемдегі ең ірі ет өндіруші кәсіпорынға қарсы шабуылдарға қатысы бар деп айыптаған.