Актан Арым Кубаттын “Кара. Кызыл. Сары” тасмасы Шанхай фестивалында “Эң мыкты тасма” сыйлыгын алды
Режиссёр Актан Арым Кубаттын “Кара. Кызыл. Сары” толук метраждуу көркөм тасмасы XXVII Шанхай эл аралык кинофестивалынын “Эң мыкты тасма” сыйлыгын алды. Бул тууралуу “Кыргызфильм” улуттук киностудиясы кабарлады.
Кинофестиваль 13-22-июнь күндөрү Кытайдын Шанхай шаарында өттү. Тасманын сценарийи жазуучу Топчугүл Шайдуллаеванын аңгемелеринин негизинде жазылып, тартуу иштери Баткен облусунда жүргүзүлгөн.
Тасмада килем токуучу Турдугүлдүн тагдыры баяндалат. Фильм сүйүү, үй-бүлөдөгү жоопкерчилик, ошондой эле миграция жана чек ара аймактарындагы жашоо көйгөйлөрүн чагылдырат.
Шанхай эл аралык кинофестивалы - Кытайдагы эң чоң кинофестиваль. Ал биринчи жолу 1993-жылы өткөрүлүп, анда 33 өлкөдөн 167 тасма көрсөтүлүп, 300 миңден ашык көрүүчү катышкан. (BTo)