Тажикстанда өмүр бою эркинен ажыратылган адам абакта каза болду
Тажикстанда өмүр бою эркинен ажыратылган Тоолуу Бадахшан автоном облусунун тургуну 35 жаштагы Аслан Гулобов 9-июнь күнү кечинде абакта көз жумду. "Озоди" радиосу өздүк булактарына таянып жазгандай, маркум ашказанынан катуу кан кетип каза болгон.
Маркумдун өлүмү тууралуу алгач маалыматты Европада жашаган тажик журналисти Анора Саркорова өзүнүн Facebook баракчасына жазган. Анын айтымында, Гулобов көп жолу ден-соолугуна байланыштуу тынчсыздануусун билдирип, өз убагында медициналык жардам алган эмес.
Гулобовдун жакындары журналисттерге анын абалы акыркы эки айда кескин начарлаганын жана алардын медициналык жардам көрсөтүү тууралуу өтүнүчтөрү канааттандырылбаганын айтып беришти.
Журналисттердин ал кармалган абактын администрациясынан расмий комментарий алуу аракетинен майнап чыккан эмес.
2022-жылы Аслан Гулобов Коррупцияны алдын алуу боюнча мамлекеттик комитеттин Тоолуу Бадахшан автоном облусунун башчысы Абдулло Назаровду өлтүрүүгө катыштыгы бар деп айыпталып, өмүр бою эркинен ажыратылган. Назаров 2012-жылы киши колдуу болгон. Гулобов жана башка бул иш боюнча айыпталгандардын соттук отурумдары жабык эшик артында өткөн. Алардын бири да күнөөсүн мойнуна алган эмес.
Тажикстанда 2022-жылы май айында Тоолуу Бадахшандагы бийликке нааразылык толкунун басуу учурунда расмий маалыматтар боюнча кеминде 16 киши набыт болгон. “Азаттыктын” тажик кызматынын журналисттери 34 адам өлгөнүн тактаган. Окуяга байланыштуу Жогорку Сот беш кишини өмүр бою эркинен ажыраткан. Жүздөгөн кишилер камалган. (AiA)