Вуруди шаҳрвандони 12 кишвар ба Амрико манъ шуд
Шуруъ аз 9-уми июн фармони президент Доналд Трамп дар бораи манъи вуруди шаҳрвандони 12 кишвар ба Амрико ба иҷро даромад. Бар асоси ин фармон, шаҳрвандони Афғонистон, Эрон, Мянмар, Чад, Конго, Гвинея, Еритерия, Ҳаитӣ, Либия, Сомали, Судон ва Яман наметавонанд ба Амрико сафар кунанд.
Илова бар ин, маҳдудиятҳои бештаре низ барои мусофирон аз кишварҳои Бурунди, Куба, Лаос, Серра-Леоне, Того, Туркманистон ва Венесуэла ҷорӣ шудааст.
Ба гуфтаи мақомоти Амрико, раводиде, ки ба шаҳрвандони ин кишварҳо пештар дода шуда буд, эътибори худро нигоҳ медоранд ва дорандагони онҳо метавонанд ба ИМА ворид шаванд. Аммо дархости нави шаҳрвандони ин кишвар аз ин ба баъд ба истиснои ҳолатҳои муайян рад мешудааст.
Ба гузориши расонаҳои амрикоӣ, рӯзи 9-уми июн дар фурудгоҳҳои калонтарини Амрико тағйироти ҷиддие ба назар намерасид.
Доналд Трамп моҳи январ ба мақомоти кишвараш дастур дода буд, то дар бораи "нигоҳи душманона" нисбат ба Амрико, як гузориш таҳия шавад.
Дар ин фармон хоста шуда буд, ки баррасӣ шавад, оё вуруд аз бархе кишварҳо таҳдиде барои амнияти миллӣ ба шумор меравад ё не.