Кыргызстанда орус тилдүү мектептер көбөйүүдө

Кыргызстанда орус тилинде жалпы билим берген орто мектептердин саны жыл сайын 4-5% көбөйүүдө. Улуттук статистика комитетинин эсептерине ылайык, соңку 10 жыл ичинде жалаң орус тилинде билим берген мектептер 5% көбөйдү. Ал эми кыргыз-орус тилинде аралаш окуткан мектептердин санында 19% өсүш болгон.

2024-жылдын соңундагы расмий статистикага ылайык, Кыргызстанда 260 мектеп жалаң орус тилинде, 576 мектеп кыргыз-орус тилинде билим берет. Бул жалпы 2394 орто мектептин 1/3 (үчтөн бирин) түзөт. Мындан тышкары өзбек-орус, кыргыз-орус-өзбек жана орус-өзбек-тажик тилдеринде билим берген жүздөн ашуун орто мектеп бар.

Ошол эле маалда, кыргыз тилдүү мектептердин саны он жыл мурдагы көрсөткүчкө караганда 4% азайып кеткен.

Ал эми орус тилинде окуган окуучулардын саны 2015-жылдан бери 8% өссө, кыргыз-орус тилинде аралаш окугандардын саны эки эседен ашкан (203%).

2024-жылдын соңуна карай жалаң орус тилинде окуган балдардын саны жалпы окуучулардын ичинде 149 миң болсо (21%), кыргызча-орусча билим алгандар 660 миңге жетет (79%).

Кыргызстан быйылтан тартып окуучуларды кийинки класска көчкөндө кыргыз тилинен милдеттүү экзамен тапшырта баштады. Сынак лексика-грамматика, окуу-түшүнүү жана жазуу боюнча өтөрү, быйыл 5-6-класстар, ал эми келерки 2025-2026-окуу жылынан тартып 7-8 жана 10-класстар тапшырары маалымдалган.

Акыйкатчынын басма сөз кызматы 5-июнда таркаткан маалыматына ылайык, республика боюнча 53 мектепке барып, 5-6-класстын окуучуларын кийинки класска көчүрүүдө кыргыз тили боюнча билим деңгээлин текшерүү үчүн уюштурулган экзаменге мониторинг жүргүзүү пландалган. Бирок 49 гана мектеп камтылды. Акыйкатчынын өкүлдөрү Бишкектин төрт мектебине кире алган жок.