Татарстан шәһәрләрендә һәм районнарда гает намазыннан соң шәһәркүләм гаилә бәйрәмнәре уза

Корбан бәйрәме уңаеннан Татарстан шәһәрләрендә һәм районнарда шәһәркүләм балалар һәм гаилә бәйрәмнәре узачак. Нәзарәт мәчетләре барлык теләүчеләрне төрледән-төрле чараларга көтеп кала: алар мәчет янәшәсендә дә, шулай ук җәмәгать урыннарында, паркларда, скверларда, стадионнарда узачак.

Корбан бәйрәменең беренче көнендә, 6 июньдә, гает намазыннан соң, балалар өчен аттракционнар һәм карусельләр, мастер-класслар эшләячәк, спорт ярышлары, кыйммәтле бүләкләр каралган Коръән бәйгеләре, рәсем һәм шигырь конкурслары, викториналар, квестлар узачак, тәм-томнар, попкорннар, коймаклар һәм пылаулар булачак.

Шулай ук гаилә бәйрәмнәрендә хәләл ярминкә эшләячәк.

Казанда бәйрәмнәр 4 урында булачак – «Әбүгалисина», «Котдус», «Иман Нуры» мәчетләрендә, ә Кремль яр буенда исә – «Корбан Фест» – биредә 10 меңнән артык кешенең катнашуы көтелә, диелә хәбәрдә.