Жапония Өзбекстандын 10 миң жаранына иш берет
Өзбекстандын өкмөтүнө караштуу Миграция агенттиги жапониялык General Incorporated Foundation (JCAEMCE) уюму менен 10 миң өзбекстандыкты Жапонияда беш жыл ичинде ишке орноштуруу боюнча келишимге кол койду. Бул тууралуу коңшу өлкөнүн Миграция агенттиги кабарлады.
Маалыматка караганда, аталган агенттик Жапонияда иштегиси келген өзбек жарандарына жумуш ордун табуу жана даярдоо иштерин аткарат.
Макулдашууга ылайык, Өзбекстандын Ташкент, Самарканд жана Наманган шаарларында жапон тилин үйрөткөн курстар ачылат.
Ушул айда WiseBridge деп аталган онлайн платформа ишке кирет. Анын жардамы менен Жапониядагы иш берүүчүлөр менен түз байланышуу мүмкүнчүлүгү түзүлөт.
Өзбекстандын расмий өкүлдөрүнүн Жапонияга болгон иш сапарынын алкагында визалык режимди жөнөкөйлөтүү маселелери да талкууланды.
Борбор Азиянын башка өлкөлөрүндөй эле Өзбекстандын экономикасы да чет өлкөдө иштеген мигранттардын акча которуусунан көз каранды. Коңшу өлкөдө чет жакка кеткен мигранттардын басымдуу бөлүгү Орусияда иштейт.
2024-жылы Москвада “Крокус Сити Холлдо” кеминде 145 кишинин өмүрүн алган куралдуу чабуулдан кийин Орусияда мигранттарга каршы маанай күчөгөн. Кылмышка шектүүлөрдүн көбү тажик тектүү жарандар экени аныкталып, кармалган.
Расмий Москва ошондон бери мигранттарга талап-эрежелерди кыйла катаалдатып, аларга каршы мыйзамдар кабыл алынып жатат. (AiA)