Татарстан Гидрометеоүзәге республикада җәен һава торышы нинди булачагы турында сөйләде
Россия Гидрометеоүзәге фаразына караганда, Татарстанда июнь аенда уртача айлык температура нормадан бер градуска югарырак булыр дип көтелә, ул республика буенча 17,8 градус тәшкил итә. Бу хакта «Татар-информ» агентлыгына ТР Гидрометеорология һәм әйләнә-тирә мохитне күзәтү идарәсе башлыгы Феликс Гоголь хәбәр итте.
Аның сүзләренчә, июнь аенда безнең төбәктә явым-төшем күпьеллык нормага якын булыр дип көтелә, ул Казанда – 57, республикада 60 миллиметр тәшкил итә.
«Июнь һәм июль – елның иң яңгырлы айлары. Иң күп явым-төшем, гадәттә, июль аенда күзәтелә», - дип искәртте Гоголь.
Ул билгеләп үткәнчә, Россия Гидрометеорология үзәге фаразлавынча, Татарстанда июль һәм август айларында температура нормадан бер градуска югарырак булыр дип фаразлана. Татарстанда июль аенда уртача айлык һава температурасы - 19,9 градус, ә августта 17,7 градус тәшкил итә. Җәй айларында явым-төшем (июльдә – 56, августта - 54 миллиметр) климат нормасы чикләрендә көтелә. Төгәллек кертелгән фаразлар һәр ай башында тәкъдим ителәчәк, дип искәртте Гоголь. Гомумән, аның сүзләренчә, җәй эссе булачак.