Өченче һәм дүртенче балага ана капиталына өстәмә түләүләр кертергә тәкъдим иттеләр
Дәүләт Думасы депутаты Сергей Миронов Премьер-министр Михаил Мишустинга ана капиталы программасын киңәйтү тәкъдиме белән мөрәҗәгать итте. Түбән палата вице-спикеры Александр Бабаков автордаш булган мөрәҗәгатьтә өченче һәм дүртенче балага федераль түләүләр кертү инициативасы бар. Бу хакта РИА Новости хәбәр итә.
Әлеге түләүләрнең күләме, тәкъдим авторлары фикеренчә, икенче бала өчен билгеләнгәннән түбәнрәк булмаска һәм ел саен индексацияләнергә тиеш.
Миронов программаны киңәйтү күп балалыкны стимуллаштыру өчен кирәк, дип аңлатты. Ул ассызыклаганча, бүгенге көндә федераль ана капиталы системасы өченче балага түләүне карамый, аның фикеренчә, бу туучылар саны артуга ярдәм итми. Сәясәтче искәрткәнчә, аның партиясе элегрәк түләүләрнең прогрессив шкаласын кертергә тәкъдим иткән иде, шул вакытта капитал күләме һәр алдагы балага артыр иде, әмма бу инициатива әлегә Хөкүмәттә һәм парламент күпчелегендә хуплау тапмады.
Миронов сүзләренчә, яңа инициатива - компромисс адым: өченче һәм дүртенче балага булса да өстәмә түләү кертү тәкъдиме прогрессия системасына беренче адым булачак. Февраль индексациясеннән соң беренче балага ана капиталы күләме 690 мең сумнан артык тәшкил итә, икенче балага өстәмә түләү якынча 222 мең сум каралган, ә беренче балага түләүләр булмаса, гаилә икенче балага 912 мең сумнан артык алырга мөмкин, дип өстәде ул.
Парламентарий шулай ук ана капиталы демографик сәясәтнең иң нәтиҗәле чараларының берсе булып кала, дип белдерде. Шул ук вакытта ул билгеләп үткәнчә, Россиядә туучылар коэффициенты (1,4) элеккечә түбән һәм дәүләткә гаиләләргә активрак ярдәм күрсәтергә кирәк, бигрәк тә репродуктив яшьтәге хатын-кызлар саны кимү шартларында.
Күп балалыкка ярдәм итү «Гаилә» илкүләм проекты максатларына туры килә.