Депутат күп балалы гаиләләргә таксида йөрү өчен ташламалар бирергә тәкъдим итте
Дәүләт Думасының Гаиләне саклау, ата-ана һәм балалар мәсьәләләре комитеты рәисенең беренче урынбасары Татьяна Буцкая Дәүләт хезмәтләре порталында шәхси кабинетта QR-код аша күп балалы гаиләләргә такси өчен түләүгә ташлама бирергә тәкъдим итте. Бу хакта «Российская газета» яза.
Ул билгеләп үткәнчә, Россиядә күп балалы гаиләнең бердәм паспорты бар инде. Гаилә статусын раслый торган QR-кодны такси заказы системасына интеграцияләү тәкъдим ителә. Аның сүзләренчә, Россия Цифрлы үсеш, элемтә һәм массакүләм коммуникацияләр министрлыгы белән бу мәсьәлә буенча фикер алышу бара.
«Гаиләгә бәйләнгән менә бу QR-кодны такси заказы системалары белән тоташтырырга тырышабыз», - дип аңлатты депутат.
Буцкая ассызыклаганча, мондый чара машинага заказ биргәндә күп балалы гаиләләргә автомат рәвештә ташламалар бирергә мөмкинлек бирәчәк.