د سوات ولسي مشرانو او د بېلابېلو ګوندونو سياسي مخکښانو په ملاکنډ ډوېژن کې د نويو ټیکسونو د ممکنه نفاذ د مخنیوي او په سیمه کې د امنیت ښه کولو لپاره ټولګوندیزه غونډه کړې ده. د عوامي نيشنل ګوند په کوربه توب هغه غونډه د مې پر ۲۰مه په سوات کې جوړه شوې وه، خو صوبايي واکمن ګوند پاکستان تحریک انصاف ګډون نه وو پکې کړی. د غونډې ګډونوالو د پاکستان د مرکزي حکومت له خوا په ملاکنډ کې د نويو ټیکسونو د ممکنه نفاذ مخالفت وکړ او بلخوا يې په سيمه کې د بدامنۍ پر پېښو اندېښنه وښوده. د پاکستان مرکزي او د خيبر پښتونخوا صوبايي حکومتونو لا په سوات کې د ټولګوندیزې غونډې د غوښتنو په اړه څه نه دي ویلي.
