Al-Hadath: Газада ХАМАСтын лидери Мухаммед Синвардын сөөгү табылды

Израилдин чабуулдарында мерт болгон Газа тилкесиндеги АКШ менен Европа Биримдиги террордук уюм деп тааныган ХАМАСтын лидерлеринин бири Мухаммед Синвардын сөөгү табылды. Бул тууралуу Сауд Арабиядагы Al-Hadath телеканалы өз булактарына шилтеме кылып кабарлады. Маалыматка караганда, анын сөөгү Хан-Юнис районундагы тоннелде табылган.

Аны менен кошо ондой жардамчысынын дагы сөөгү табылды.

ХАМАС бул билдирүү тууралуу азырынча комментарий бере элек. Израил дагы Синвардын өлүмүн ырастаган жок.

Шейшемби күнү Израилдин армиясы Хан-Юнистеги ооруканага сокку урган. The Times of Israel басылмасы анын башкы максаты Мухаммед Синварды жок кылуу болгонун жазган. ЦАХАЛ муну бышыктаган же төгүнгө чыгарган эмес.

Мухаммед Синвар ХАМАСтын мурдагы башчысы Яхья Синвардын кичүү иниси.

Яхья Синвар былтыр августта ХАМАСтын саясий канатынын лидери болуп дайындалган. Ага чейин бул милдетти аркалаган Исмаил Хания 31-июлда Тегеранда жок кылынган.

Яхья Синвар 2023-жылы 7-октябрдагы Израилге кол салуулардын уюштуруучусу деп аталып келген. Израилдин армиясы былтыр октябрда ал өлтүрүлгөнүн билдирген.