Илкүләм проект ярдәмендә татарстанлылар 2026 елга төзекләндерү объектларын сайлый алачак
Татарстанда «Яшәү өчен инфраструктура» илкүләм проекты кысаларында төзекләндерү объектлары өчен ел саен үткәрелә торган Бөтенроссия тавыш бирү башланды. Республиканың һәр кешесе киләсе, 2026 елда, нинди иҗтимагый киңлекләрнең үзгәрәчәген билгели алачак.
«Уңайлы шәһәр мохите булдыру» федераль проекты халыкка паркларны, скверларны һәм йорт яны территорияләрен төзекләндерүгә турыдан-туры йогынты ясау мөмкинлеге бирә.
Тавыш бирүдә Татарстан Республикасының һәр муниципаль районында һәм шәһәр округында төрле объектлар тәкъдим ителгән, шулардан халык 2026 елга «Безнең ишегалды» программасына кертү өчен парклар, скверлар, яр буйлары һәм ишегалларын сайлый алачак.
«Тавыш бирү нәтиҗәләре буенча нигездә парклар, скверлар, иҗтимагый зоналар, яр буйлары һәм йорт яны территорияләре төзекләндереләчәк. Илкүләм проектлар Татарстан шәһәрләренең йөзен үзгәртүен дәвам итә, халыкка үзләренең кече ватаннары үсешенә реаль йогынты ясау инструменты бирә», – дип белдерде «Татар-информ»га «Татарстан волонтерлык мәгълүмати-ресурс үзәге» коммерцияле булмаган автоном оешмасының территорияләр белән эшләү секторы мөдире һәм башкарма директоры урынбасары Гүзәл Ганиева.
Тавыш бирүдә дәүләт хезмәтләре порталында теркәлгән 14 яшьтән башлап һәр граждан катнаша ала.
Татарстан башкаласында яшәүчеләргә проект турында 17 һәм 18 майда KazanMall сәүдә үзәгендә, Җиңү паркында, «Кольцо» сәүдә үзәге янында һәм Мәскәү базары территориясендә эшләүче волонтерлар сөйли.
Волонтерларны шул нокталарда брендлы форма буенча танып була: алар QR-кодлы листовкалар тарата һәм гражданнарга теләгән объектлар өчен тавыш бирергә ярдәм итә.
2024 елда гражданнарга тавыш бирү турында хәбәр итәргә бөтен Татарстан Республикасы буенча 617 волонтер ярдәм итте. Гомумән алганда, волонтерлар мәгълүмати материаллар белән 40 мең буклет тараткан.
Татарстан Рәисе Рөстәм Миңнеханов Россия Федерациясе Дәүләт Советының «Яшәү өчен инфраструктура» юнәлеше буенча комиссияне, ул шул ук исемдәге илкүләм проектны җитәкли.