Айдар Газизов: Ялган «хәләл» продукция турында кулланучылар хәбәр итеп барсыннар иде

РФ мөселманнары Диния нәзарәте каршындагы Халыкара стандартлаштыру һәм сертификация үзәге генераль директоры Айдар Газизов ялган «хәләл» продукция, контрафактка каршы көрәш турында сөйләде. «Ялган «хәләл» продукция турында хәбәр итеп барсыннар иде», – дип өндәде ул «Татар-информ» мәгълүмат агентлыгында «KazanForum» кысаларында хәләл индустрия темасына матбугат очрашуында.

Айдар Газизов инде шактый еллар «хәләл» юнәлештә эшләүче шикле комитет, үзәкләр булуын яшермәде. «Янәсе, намуслы булып күренергә теләгән, аңлашылмый торган шикле оешмалар бар. Аларның эшчәнлеге, контрафакт үсүе безне борчый. Бу проблема Равил хәзрәт Гайнетдинны да, Камил хәзрәт Сәмигуллинны, башка Диния нәзарәте җитәкчеләрен дә борчый. Бергә алып барыла торган адымнар, контрафакт белән көрәш якын арада тәртип урнаштырырга мөмкинлек бирер дип ышанам», – диде Айдар Газизов.

Ул хәләл продукция һәм хезмәтләрне кулланучыларның хокукларын яклау буенча оешма булуын искәртте. «Аны федераль оешма итәргә телибез. Җәмәгать эшлеклеләре, дин әһелләре, сатып алучылар хокук бозулар, контрафакт продукция турында әйтсеннәр иде. Дин кануннары буенча яшәүчеләрнең хокуклары саклана», – диде.

Айдар Газизов намуслы сертификация органыннан хәләл тамгасы сыйфат, ышаныч күрсәткече булуын ассызыклады. «Хәләлне без дин күзлегеннән генә түгел, сыйфат ягыннан алга сөрәбез. Мөселман, татар булмаганнар да югары сыйфатлы булганы өчен хәләлне сайлый, чөнки хәләл юнәлеш азык-төлек куркынычсызлыгын өстен куя», – дип белдерде.

Ул хәләл продукциянең экспортта зур роль уйнаганын, яңа эш урыннары булдыруда әһәмиятен дә билгеләп үтте.