Россия Риелторлар гильдиясендә бүген фатир сатып алуның отышлы вариантын атадылар

Әгәр кеше ташламалы ипотека ала ала икән, хәзер торак сатып алуы яхшырак, чөнки яңа төзелгән торак базарында бәяләр кимү тренды күзәтелә. Бу хакта «Татар-информ»га Россия Риелторлар гильдиясе вице-президенты Константин Апрелев хәбәр итте.

«2024 елның 1 июленнән бирле төзүчеләр бәяләре төшмәячәге турында белдерде. Хәзер исә аналитиклар яңа төзелгән торак биналардагы тәкъдимнәргә бәяләр кимү турында мәгълүмат урнаштыра. Бәяләр арту туктап кына калмаган, кайбер проектларда бәяләр хәтта кимегән дә. Һәрхәлдә, бәяләр төшү тренды барлыкка килде. Булган ресурсларыгызны исәпкә алырга кирәк. Әгәр дә сез еллык 6 процент ставкалы ташламалы ипотека ала алсагыз, бу мөмкинлектән файдаланырга кирәк, чөнки сез ипотека өчен базар ставкалары белән түләмәячәксез», – дип сөйләде агентлык әңгәмәдәше.

Фатир сатып алу өчен иң отышлы вакыт турында уйлаганда тагын бер факторны исәпкә алырга кирәк. Бу – банкның сезгә траншлы ипотека бирергә әзерлеге.

«Башка сүзләр белән әйткәндә, сез беренче елда 20 процентны түлисез, ә киләсе процентларны йортны файдалануга тапшырганнан соң гына түли башлыйсыз. Бу сатып алучы өчен кулай була, чөнки ул объект төзелгән чорда ипотека түләми. Әгәр дә траншлы ипотека алу варианты юк икән, йортны тапшыру вакытын һәм төзүченең ышанычлы булуын исәпкә алырга кирәк. Якын арада – бу кварталда яки агымдагы елда тапшырылачак объектларны сайларга тырышыгыз», - дип киңәш итте Апрелев.

Әгәр кешенең базар ипотекасын гына алу мөмкинлеге бар икән, ул вакытта исә торак сатып алырга ашыгырга кирәкми, дип саный эксперт.

«Ташламалы ипотекадан файдалана алмыйсыз икән, 26 процент ставкалы базар ипотекасына ризалашырга кирәкми. Акчаны депозитка салу һәм Үзәк банкның төп ставканы үзгәртүен көтү яхшырак. Әлегә ставка яхшы булмаса, акча җыюны дәвам итәргә кирәк», – дип йомгаклады Россия Риелторлар гильдиясе вице-президенты.