Trump thotë se do ta mbajë përgjegjës Iranin për sulmet e rebelëve Huthi
Presidenti amerikan, Donald Trump, tha se ai do ta mbajë përgjegjës Iranin për çdo sulm që do të kryhet nga rebelët jemenas, Huthi, që mbështeten nga Teherani, teksa administrata e tij ka zgjeruar operacionin më të madh ushtarak të Shteteve të Bashkuara në Lindjen e Mesme që kur Trump u rikthye në Shtëpinë e Bardhë.
Duke iu përgjigjur kërcënimeve të rebelëve Huthi ndaj anijeve ndërkombëtare të mallrave, SHBA-ja nisi një valë të re të sulmeve ajrore të shtunën. Të hënën, qyteti-port i Hodeidas dhe qyteti Javf në Jemen u shënjestruan, raportoi televizioni Al Masirah që udhëhiqet nga rebelët në Jemen.
“Çdo e shtënë nga Huthit do të shikohet tash e tutje si e shtënë nga armët dhe udhëheqja e Iranit dhe Irani do të mbahet përgjegjës dhe do të vuajë pasojat, e këto pasoja do të jenë të rënda”, shkroi Trump në platformën e tij Truth Social.
Shtëpia e Bardhë tha se mesazhi i Trumpit ndaj Iranit ishte që SHBA-ja të merret seriozisht.
Rebelët Huthi, organizatë e shpallur terroriste nga SHBA-ja, të cilët kontrollojnë shumicën e territorit të Jemenit, kanë kryer dhjetëra sulme ndaj anijeve që kalojnë pranë brigjeve të Jemenit që nga nëntori i vitit 2023, duke penguar tregtinë globale.
Një zyrtar amerikan i thanë Reutersit se sulmet mund të vazhdojnë për javë të tëra. Uashingtoni po ashtu ka rritur presionin ndaj Iranit përmes sanksioneve, teksa po tenton ta sjellë Teheranin në tavolinën e negociatave lidhur me programin e tij bërthamor.
Trump përmes një letre drejtuar Iranit ka propozuar mbajtjen e bisedimeve bërthamore, një propozim që është kundërshtuar nga lideri suprem iranian, Ajatollah Ali Khamenei.
Rebelët Huthi kanë thënë se sulmet e tyre – që kanë detyruar shumë kompani që të ndryshojnë rrugën dhe të përdorin rrugë më të gjata dhe më të kushtueshme përreth jugut të Afrikës për të transportuar mallrat e tyre – janë në shenjë solidariteti me palestinezët, për shkak të luftës në Gazë.
SHBA-ja dhe aleatët e saj kanë thënë se sulmet po pengojnë tregtinë globale.
Udhëheqësi i grupit Huthi është zotuar se rebelët do të shënjestrojnë anijet amerikane në Detin e Kuq për aq kohë sa SHBA-ja do të vazhdojë sulmet në Jemen.
Rebelët Huthi kanë dhjetëra mijëra luftëtarë dhe kanë një arsenal dronësh dhe raketash balisitike. Arabia Saudite dhe Perëndimi kanë thënë se armët e tyre vijnë nga Irani, por Teherani e mohon këtë akuzë.
Rebelët Huthi janë pjesë e të ashtuquajturit “Bosht të Rezistencës”, që përbëhet nga bashkëpunëtorë rajonalë të Teheranit që kundërshtojnë Iranin dhe Perëndimin. Në të bëjnë pjesë edhe Hamasi dhe Hezbollahu, grupe të shpallura terroriste nga SHBA-ja.
Izraeli ka thënë se ka dobësuar shumë shumicën e aleatëve rajonalë të Iranit, që kur shpërtheu lufta në Gazë tetorin e vitit 2023. Që atëherë, Izraeli ka vrarë udhëheqës të lartët ë Hamasit dhe Hezbollahut, teksa rrëzimi i Bashar al-Assadit nga pushteti në Siri është parë si një goditje e madhe për Teheranin.