Орусияда мыйзамсыз жүргөн кыргыз жарандарына укуктук жардам керектиги айтылды

Эмгек, социалдык камсыздоо жана миграция министри Равшанбек Сабиров Орусияда миграциялык мыйзам бузганы аныкталган 72 миңге жакын кыргызстандык жаранга укуктук колдоо көрсөтүү керек экенин айтты. Аларды өлкөгө алып келүү жана ишке орноштуруу үчүн шарт түзүү зарыл экенин кошумчалады.


Алар Орусиянын Ички иштер министрлигинин маалымат базасында эмгектик же жарандык-укуктук келишим түзгөндүгү, бармак изин каттоодон жана медициналык текшерүүдөн өткөндүгү, миграциялык каттоого тургандыгы жөнүндө маалыматы жок адамдар.


1-январдан тартып чет өлкөлүк жарандардын Орусияда жүрүү убактысы 180 күндөн 90 күнгө чейин кыскартылды. Бул Орусияда тиешелүү уруксат документтери - убактылуу/туруктуу жашоого уруксаты, эмгек же жарандык-укуктук келишими жок жүргөн чет өлкөлүк жарандарга колдонулат.




5-февралда Орусияда жаңы укуктук режимди киргизген мыйзам күчүнө кирет. Ал мыйзамга ылайык, Орусиянын аймагында жүрүүгө, жашоого мыйзамдуу негиздери жок чет элдиктер өлкөнүн аймагынан чыгарылат. Ички иштер органдары (соттор менен бирге) чет өлкөлүк жарандарды айрым укук бузуулары үчүн Орусиядан депортациялоого укуктуу болот.


Кыргызстандын Тышкы иштер министрлиги (ТИМ) бул мыйзам Орусиядагы кыргыз жарандарына да тиешелүү экенин эскертип, бул өлкөдө жүргөн мекендештерди тиешелүү органдарга тез арада кайрылууга жана өз укуктук абалын мыйзамдаштырууга чакырган.


Расмий маалыматтарга ылайык, Орусияда Кыргызстандын 334 миңдей жараны миграцияда жүрөт.


Былтыр Москвада “Крокус Сити Холлдо” кеминде 145 кишинин өмүрүн алган куралдуу чабуулдан кийин Орусияда мигранттарга каршы маанай күчөгөн. Кылмышка шектүүлөрдүн көбү тажик тектүү жарандар экени аныкталган. (BTo)