Гренландиянын тургундары кааласа, арал эгемен болушу мүмкүн, бирок АКШнын штаты болбойт. Бул тууралуу Даниянын тышкы иштер министри Ларс Лөкке Расмуссен шаршембиде билдирди. Анын алдында АКШнын шайланган президенти Дональд Трамп Даниянын башкаруусундагы аралды сатып алуу маселесинде экономикалык же аскердик күч колдонууну жокко чыгаруудан баш тарткан.
Гренландиянын лидери Муте Эгеде 8-январда Копенгагенде Даниянын падышасы менен сүйлөшүү жүргүздү.
Трамп дүйнөдөгү эң ири аралды падышалыктан сатып алуу ниетин бир нече жолу кайталап, бул – АКШнын коопсуздугу үчүн “абдан маанилүү” экенин айткан. 7-январда анын уулу Дональд Трамп Гренландияга жеке сапар менен барды.
57 миң калктуу арал 600 жыл Даниянын бөлүгү болуп келгени менен гренландиялыктар ички маселелерин өздөрү тескейт.
Министр Расмуссен Орусия жана Кытайдын аймактагы активдүүлүгүн эске алганда АКШнын Арктикадагы коопсуздукка байланышкан камтамасын түшүнөрүн кошумчалады.
Ал эми Даниянын өнөктөштөрүн Ак үйдүн болочок кожоюнунун кооптуу ымагы тынчсызданткандай.
8-январда Франциянын тышкы иштер министри Жан-Ноэль Барро Еврошаркет башка өлкөлөрдүн өз чек араларын бузуусуна жол бербесин билдирди. Муну менен бирге министр АКШ "аралга басып кирет" деп ойлобосун кошумчалады.
Арктикадагы арал Түндүк Американын түндүк-чыгышында жайгашкан. Саясий жактан ал Европага карайт. АКШдан Европага эң кыска жол Гренландия аркылуу жатат. Ал жакта минералдарга бай кендер жатат.
