АКШда куш тумоосунан каза тапкан алгачкы учур катталды
Маалыматка караганда, 65 жаштагы бейтап башка илдеттерден да жабыркап жүргөн. Аны өткөн айда ооруканага жаткырышкан. Дарыгерлер маркум вирусту үйүндө баккан жана жапайы канаттуулардан жугузуп алганын болжолдошот. Штатта куш тумоосунун башка учурлары, инфекциянын адамдан адамга жуккан учуру катталган эмес. Калкка карата коркунуч төмөн деп бааланууда. Бирок канаттуулар же үй жандыктары менен иштегендерге этият болуу сунушталат.
Былтыр АКШда куш тумоосуна чалдыккан 66 киши катталган. Дүйнөлүк саламаттык сактоо уюмунун маалыматы боюнча 2023-жылы дүйнөдө H5N1 900 кишиге жуккан, жарымына жакыны көз жумган.
Эксперттер оорунун оор түрлөрү гана катталганын, жеңил учурлар статистикага кирбегенин белгилешет. Ошол эле маалда дарыгерлер вирус мутацияга туш болуп, адамдан адамга тез жугушу мүмкүн деп эскертишет. Башка вирустардай эле куш тумоосуна каршы дары жок.
Вирустан жер которгон куштардан тышкары тоок жана башка үй канаттуулары жабыркашы ыктымал.