"Каддафиден пара алган" деп айыпталган экс-президент Саркозинин соту башталды
Тергөөнүн версиясына караганда, 2006-2007-жылдары ал кезде ички иштер министри болуп турган Саркози жана анын аппараты Каддафиден кеминде 50 миллион евро алып, акчаны шайлоо кампаниясына жумшаган. Бул үчүн Париж ал маалда эл аралык изоляцияда калган Каддафи режимине жагымдуу мамиле кылган.
Франциянын Эл аралык радиосу (RFI) кабарлагандай, прокуратура сөз болгон каражат Франциянын мыйзамдары шайлоону каржылоого жол берген өлчөмдөн ашарын белгиледи.
Саркози пассивдүү коррупция, шайлоо кампаниясын мыйзамсыз каржылоо, мамлекеттик каражатты максатсыз пайдалануу жана кылмыштуу топко катышууга айыпталууда.
Күнөөсү далилденсе, экс-президент 10 жылга түрмөгө кесилип, 375 миң евро айып пулга жыгылышы мүмкүн.
Аны менен кошо иштин дагы 11 фигуранты, арасында үч мурдагы министр соттолууда.
69 жаштагы Саркози айыптарды четке кагып, шайлоо кампаниясында Ливиянын акчасы пайдаланбаганын айтууда.
Сот жараяны 3 айга чейин уланышы мүмкүн.
Каддафи 2011-жылы Батыш колдогон элдик козголоңдун натыйжасында бийликтен төңкөрүлүп, өлтүрүлгөн.
Cаркози Францияны 2007-2012-жылдары жетектеген.