5 гыйнварда Пенза өлкәсенең Иссин районында мактаулы гражданин Закир Кормаев истәлегенә 14 нче ачык шахмат турниры узды. Бу чара инде күп еллар шахмат яратучыларны, төрле буын һәм төрле төбәк кешеләрен җыя, район үсешенә өлеш керткән күренекле кеше турында истәлек саклый, дип хәбәр итә Пенза өлкәсе татар милли-мәдәни мөхтәриятенең «ВКонтакте» төркеме.
Турнир традицион рәвештә Иссин районының балалар-үсмерләр спорт мәктәбендә узды. Ачылышта Пенза өлкәсенең Татар милли-мәдәни автономиясе рәисе Җиһанша Туктаров, районның Татар мәдәнияте җәмгыяте рәисе Рәфыйк Йосыпов, автономия рәисе урынбасары Гөлназ Самочкина, автономия башкарма комитеты әгъзасы Шамил Шабанов, шулай ук Закир Кормаевның туганнары, хезмәттәшләре, дуслары, ярышларны оештыручылар, иганәчеләр, катнашучылар һәм тамашачылар катнашты.
Җиһанша Туктаров, Закир Кормаевны үз районының гаҗәеп кешесе, җәмәгать эшлеклесе һәм чын патриоты буларак искә алып, җыелган кунакларга мөрәҗәгать итте. Ул турнирда катнашучыларга уңышлар, җиңүләр теләде, яшь буынны тәрбияләү өчен мондый традицияләрне саклауның мөһимлеген әйтте.
Чара кысаларында Җиһанша Туктаров турнирны оештырган һәм уздырган өчен өстәмә белем бирү педагогларына рәхмәт хатлары һәм бүләкләр тапшырды. Шулай ук район балалар-үсмерләр спорт мәктәбенә туплар комплекты бүләк ителде, бу районда спортны үстерүгә зур ярдәм булачак.
Турнирда катнашкан яшь шахматчылар кубоклар, грамоталар һәм медальләр алды. Ярышларда Мокшаннан, Мордовиядән, Саранскидан, Рузаевкадан һәм Иссин районыннан 10 команда катнашты. Турнир сорт чарасы гына түгел, ә аралашу, тәҗрибә алмашу һәм төрле буыннар арасында дуслыкны ныгыту мәйданчыгы да булды.
Закир Кормаев истәлегенә турнир яшьләрне берләштерергә, аларда сәламәт көндәшлек рухы, традицияләргә хөрмәт һәм шахматка мәхәббәт тәрбияләргә ярдәм итә. Чараны оештыручылар хезмәтләре һәм эшкә бирелгәнлекләре, Рәфыйк Габделбәр улына районда шахмат хәрәкәтен үстерүгә керткән өлеше өчен аерым рәхмәт сүзләренә лаек, диелә хәбәрдә.
