Казакстанда Январь окуяларынын курмандыктарын эскеришүүдө

Казакстанда Январь (Каңтар) окуяларынын курмандыктарын эскеришүүдө. 5-январда Алматы шаарынын акимчилиги жанына 3 жыл мурун болгон кандуу тиреш учурунда каза тапкандардын жакындары чогулду. «Азаттыктын» казак редакциясы маалымдагандай, алар шаар бийлиги эскерүү иш-чарасын уюштурган жок деп нааразылыгын айтышты. Жабыркагандар аким менен кездешүүнү талап кылышты. Бирок акимчиликтин кызматкерлери калаа башчысы ордунда жок деп, аларды кое бербей, башка өкүл менен жолугушууну сунуш кылышты. Талаш-тартыштан кийин маркумдардын жакындары имаратка кирип чыгышты.


Ага чейин алар Январь окуяларына арналган мемориалга барып, куран окушкан.




2022-жылдын башында газдын кымбатташына каршы митингдер бийликтин кызматтан кетишин талап кылган массалык акцияларга айланып, тоз-тополоң менен коштолгон.


Алматы ошол толкундоолордун очокторунун бири болгон. Аламандаган топ акимчиликке жана президенттик резиденцияга кирип барган. Кийин имараттарга өрт коюлган. Башкы прокуратура акимчилик менен резиденцияны басып алууга миңдей киши катышканын билдирген.


Расмий эсеп боюнча Январь окуяларында 238 киши набыт болгон. Алардын алтоо кармалгандан кийин кыйноолордон улам көз жумган. Бир нече миң киши кармалып, жүздөгөнү ыдык көргөнүнө арызданган. Бирок мындай фактыларга байланыштуу козголгон кылмыш иштердин көбү токтотулган. Эксперттер бул кандуу окуялар боюнча чындык толук ачыкка чыга элек деген пикирде.


Ал окуяларда кыргызстандык жарандар да жабыркаган.