Суд приставлары Россиянең Ачык хөкүмәт мәсьәләләре буенча элеккеге министр Михаил Абызовның 24 млрд сумлык милкен конфискацияләячәк.
Аны җинаятьчел җәмгыять оештыруда, мошенниклык һәм башка җинаятьләр өчен хөкем иттеләр, дип яза «Татар-информ».
Дәүләткә керем буларак, Абызовның 23,5 млрд сумлык милкен һәм акчасын, шулай ук 2,4 млрд сумлык башкарма җыемнарын һәм бурычларын алачаклар.
ТАСС хәбәр иткәнчә, экс-министрның гомуми бурычы 28 миллиард сумга якын.
2023 елның декабрь ахырында Мәскәүнең Преображенский суды Абызовны гаепле дип тапты һәм 80 млн сум штраф түләттереп 12 елга кырыс режимдагы колониягә җибәрде.
Экс-министр җинаятьләрдә гаебен танымады.
