Кыргызстанда акыркы үч айда метапневмовируска чалдыккан эки адам аныкталды
Метапневмовирус курч респиратордук илдеттердин себептеринин бири экенин дүйнөлүк маалымат каражаттары жазып келишет. Башында бул вируска Кытайда көптөгөн адамдар, анын ичинде балдар чалдыгып жатканы кабарланган.
Саламаттык сактоо министрлиги эскерткендей, илдет адамдарда кадимки сасык тумоо сыяктуу - жөтөл, мурундун бүтүшү, баш оору жана дене табынын көтөрүлүшү менен башталат. Айрым учурларда дем жетпей, кыйналуу байкалып, бат эле өпкөнүн кагынуусуна алып келиши ыктымал.
Дарыгерлер ооруну алдын алуу үчүн санитардык-гигиеналык талаптарды так аткарууга, эл көп чогулуучу коомдук жайларга көп барбоого, андай жерде беткап тагынып, аралыкты сактап жүрүүгө чакырууда.
Жыл жаңыргандан кийинки күндөрү Бишкектеги Жугуштуу оорулар ооруканасына кайрылган адамдардын саны көбөйгөнү кабарланган. 2-январда аталган оорукананын кабыл алуу бөлүмүнө 281 адам кайрылса, алардын 93ү гана ооруканага жаткырылган, анын 87си балдар. 188 бейтап амбулатордук дарылоого жөнөтүлгөн.
Мунун алдында саламаттык сактоо министри Алымкадыр Бейшеналиев курч респиратордук вирустук инфекциялардын (КРВИ), сасык тумоонун жана башка жугуштуу оорулардын сезондук өсүшүнө байланыштуу билдирүү таратып, жарандарды ден соолугуна көңүл бурууга жана оорунун алдын алууга чакырган. Ал бейтаптарды биринчи ирет Үй-бүлөлүк медицина борборлоруна кайрылууга үндөгөн.
6-январда Казакстандын Саламаттык сактоо министрлиги аталган илдетти жуктургандардын саны өлкөдө отуздан ашканын маалымдады.
Метапневмовирус (илимий аталышы - MPVI) 2001-жылы респиратордук оору менен ооруган балдардын канын изилдөө учурунда аныкталган. Вируска өзгөчө 5 жашка чейинки наристелер жана улгайган адамдар көп чалдыгары айтылган. Вирус аба аркылуу жана кармаган буюмдар аркылуу жугары кабарланган.(ZKo)