Бајден ја блокираше продажбата на УС Стил на Јапонија

Американскиот претседател во заминување Џозеф Бајден на 3 јануари го отфрли договорот вреден речиси 15 милијарди долари со кој се предлага јапонскиот производител на челик Нипон Стил да ја купи американската компанија УС Стил.


„Потребни ни се големите американски компании кои го претставуваат најголемиот дел од американскиот капацитет за производство на челик за да продолжат да се борат за американските национални интереси“, рече Бајден.


Комитетот за странски инвестиции во САД (CFIUS) минатиот месец не успеа да постигне консензус за можните ризици за националната безбедност и му го испрати на Бајден долгоочекуваниот извештај за спојувањето.




Американски функционер запознаен со ова прашање, кој сакаше да остане анонимен, минатиот месец за Асошиетед прес изјави дека некои федерални агенции се „скептични дека дозволувањето на јапонска компанија да купи фабрика за челик во сопственост на САД ќе создаде ризици за националната безбедност“.


Новоизбраниот американски претседател Доналд Трамп, исто така, се спротивстави на договорот и во декември вети дека ќе го блокира и дека ќе користи даночни олеснувања и тарифи за развој на US Steel.


Претседателот на синдикатот на челичарите Дејвид Мекол рече дека синдикатот е благодарен што Бајден ја блокирал продажбата, нарекувајќи го „вистинскиот потег за нашите членови и нашата национална безбедност“.


„Да се дозволи купување на американскиот челик ќе обезбеди можност за дополнително дестабилизирање на нашиот трговски систем одвнатре, а тоа ќе ја загрози нашата способност да ги задоволиме потребите за националната безбедност и критичната инфраструктура“, рече Мекол.