Татарстанда IT-компанияләр һәм IT өлкәсендә эшли торган шәхси эшмәкәрләр саны арта
2024 елда Татарстанда 55 яңа IT-компания барлыкка килде һәм аларның гомуми саны 3403 булды. Барлык төр оешмалар арасында IT белән шөгыльләнүче фирмалар өлеше дә аз гына артты. Бу хакта Татарстан Дәүләт идарәсен цифрлы нигездә үстерү, мәгълүмат технологияләре һәм элемтә министрлыгы матбугат хезмәте хәбәр итә.
Моннан тыш, мәгълүмат технологияләре белән шөгыльләнүче шәхси эшмәкәрләр саны да арта. «<...> аларның саны инде 4 меңгә җитә, һәм аларның өлеше 3,4 процент тәшкил итә», - дип ачыклык керттеләр ведомствода.
Татарстанда эшли торган IT-компанияләрнең 612се аккредитация узган оешмаларның федераль реестрына керә. 507се «Кайтык» программасыннан файдаланган, ә 110ы стартаплар реестрына кертелгән.
IT-тармакның кереме дә ел саен арта. 2024 елда ул 2023 ел белән чагыштырганда 20 проценттан артыкка арткан, өстәвенә бу башлангыч фараздан 8 процентка югарырак. Татарстан Дәүләт идарәсен цифрлы нигездә үстерү, мәгълүмат технологияләре һәм элемтә министрлыгында 2024 елда да «факттагы нәтиҗәләр шулай ук фаразлардан артып китәчәк» дип ышаналар.
Үсешнең төп драйверлары булып «үзебезнең программа тәэминатын сату, компьютерлар җитештерү, республикада мәгълүмати иминлекне тәэмин итү һәм цифрлаштыру» тора.
Үз чиратында 2024 елның 11 аенда салым керемнәре 33 млрд сум тәшкил иткән, алдагы ел белән чагыштырганда, 2024 елда ул 43 процентка арткан.