Таиланд 2025 елның 1 гыйнварыннан партнер ил сыйфатында БРИКСка кушылу турында Россиядән белдерү кәгазе алды. Бу хакта корольлекнең Тышкы эшләр министрлыгы матбугат хезмәте хәбәр итә.
Таиланд Тышкы эшләр министрлыгында ачыклык кертүләренчә, БРИКСтагы партнерлык берләшмә белән күптәнге хезмәттәшлеккә нигезләнгән. Ул әле 2017 елда, Таиланд «БРИКС плюс» механизмына кушылганнан соң ук башланган.
Тышкы сәяси ведомствода сәүдә, инвестицияләр һәм туризмны хезмәттәшлекнең төп өлкәләре сыйфатында атадылар. Таиландның кешеләр, шулай ук оешманың башка әгъзалары һәм аның партнерлары белән багланышлары дәрәҗәсендәге элемтәләре дә телгә алынды.
Корольлектә шулай ук, Көньяк-Көнчыгыш Азия илләре ассоциациясен (АСЕАН) һәм Азия-Тын океан икътисади хезмәттәшлеген (АТЭС) дә кертеп, БРИКС һәм башка төбәк берләшмәләре белән арадашчы сыйфатында чыгыш ясарга әзер булуларын да белдерделәр.
Элегрәк Таиланд Тышкы эшләр министрлыгында, БРИКСның партнер иле булырга чакыру килгәч, моңа риза булуларын әйткәннәр иде.
Таиландтан тыш, тагын ким дигәндә сигез ил 2024 елның 22-24 октябрендә оешманың Казанда узган уналтынчы саммиты нәтиҗәләре буенча 1 гыйнвардан БРИКСның партнерлары булачак.
РФ Президенты Владимир Путин ачыклык керткәнчә, БРИКС партнер илләренең тулы исемлеге алар үзләренә җибәрелгән чакыруларга уңай җавап биргәннән соң дөнья күрәчәк.
