АҚШ-тың 39-президенті, Нобель сыйлығының лауреаты Джимми Картер 100 жасында Джорджия штатындағы үйінде қайтыс болды. Бұл туралы Картер құрған қор хабарлады.
Джимми Картер – АҚШ әскери-теңіз күштерінің офицері, Джорджия штатының сенаторы және штат губернаторы болған. 1976 жылы АҚШ президенті сайлауына оның кандидатурасын Демократиялық партия ұсынған. Ол сайлауда республикашыл Джеральд Фордтан озды.
Картер АҚШ-ты 1977 жылдан 1981 жылға дейін басқарды. Ол президент болған тұста бірқатар келеңсіз оқиға болған: АҚШ-тағы Три-Майл-Айленд аралындағы атом электр станциясында апат болды, 1979 жылы жылы Иранда исламшылдар АҚШ-тың Тегерандағы елшілігін басып алды, америкалық арнайы күштердің шабуылы сәтсіз аяқталды. Ол президент болған тұста АҚШ-та инфляция күшейіп кетті. Алайда Картер халықаралық саясатта айтарлықтай жетістіктерге жеткен.
Картер президент болып тұрған кезде АҚШ Панама каналын Панаманың бақылауына беру туралы келіссөз жүргізіп, Латын Америкасы елдерімен қарым-қатынасты едәуір жақсартты (Республикалық партия бұл келісімдерді сынға алды). Ол Совет одағымен стратегиялық жойқын қаруды шектеу туралы келісімге қол қойған. Картер 1978 жылы Израиль мен Египет арасындағы бейбітшілік туралы тарихи келісімге қол жеткізген.
Джимми Картер – баламалы энергетика жобаларын дамытуды бастаған АҚШ-тың алғашқы президенті. Ол теңдік пен нәсіл интеграциясын қолдап, кемсітушілікке қарсы заң жобалары мен бастамаларды алға тартып, азшылық өкілдерінің құқығын қолдады.
1980 жылғы сайлауда Рональд Рейганнан жеңілген Картер демократиялық және гуманитарлық құндылықтарды насихаттайтын қор құрған.
Ол қоғамдық жұмыстармен белсенді айналысып, бейбіт бастамалар көтеріп, адам құқығын қолдап, жағдайы төмен адамдарға баспана салған. 2002 жылы ол "бүкіл әлемдегі қақтығыстарды бейбіт жолмен шешуге және адам құқықтары үшін күресуге күш салғаны үшін" Нобель сыйлығын алды.
