«Ватанны саклаучылар» фондының Татарстан филиалында махсус хәрби операция катнашучылары һәм ветераннарының гаиләләре икенче мәртәбә ТР мөфтиенең махсус операциядә катнашучыларга һәм аларның гаилә әгъзаларына ярдәм итү мәсьәләләре буенча урынбасары Мансур хәзрәт Җәләлетдинов белән очрашты. Ул һәр чәршәмбе социаль хезмәткәрләр, юристлар һәм психологлар белән бергә ярдәмгә мохтаҗ кешеләрне кабул итә.
Мансур хәзрәт әйтүенчә, күпләр намаз уку мәсьәләләре белән кызыксына. «Мин фондка бу уникаль мөмкинлек өчен бик рәхмәтле. Әлеге кабул итү сәгатьләре рухи ярдәмгә мохтаҗ кешеләр өчен оештырылды», - дип ассызыклады ул «Татар-информ» белән әңгәмә вакытында.
«Кешеләрне төрле мәсьәләләр борчый. Күбесе гаилә проблемаларын хәл итү, теге яки бу шәхесара конфликтларга диннең нинди карашта булуын белер өчен килә. Мәсәлән, берничә тапкыр ислам күзлегеннән караганда хәбәрсез югалганнарга бәйле вәзгыять турында сораштылар», - диде агентлык әңгәмәдәше.
«Окопларда динсез кеше булмый, дигәнебез бар инде. Хәрби хәрәкәтләр зонасыннан кайткан егетләр дә килә, дингә килү мәсьәләсен нәрсәдән башларга, намазга ничек басарга икәнен сораша», — дип өстәде ТР мөфтие урынбасары.
Хәзрәт белән очрашулар һәр чәршәмбедә 9:30 сәгатьтән 12:00 сәгатькә кадәр фондның Татарстан филиалында (Казан, Ямашев проспекты, 1 йорт) уза. Телефон: 8 (843) 598-33-55.
Материал Айгөл Әхмәдишина катнашында әзерләнде.
