Улуттук коопсуздук боюнча мамлекеттик комитети (УКМК) Нарында токой чарба ишканасынын мурдагы директору жана Нарын кадастрынын кызматкери кармалганын кабарлады.
Мекеменин басма сөз кызматы 28-декабрда тараткан маалыматка ылайык, атайын кызмат ыкчам-издөө иштеринин жүрүшүндө Нарын токой фондусунан болжолдуу баасы 1 млрд.168 млн. сомду түзгөн аянты 208,7 га жер тилкесин менчикке мыйзамсыз берүү жана ижарага берүү фактысын аныктаган.
Маалыматта: "2016-жылдын июнь айында Өзгөчө кырдаалдар министрлигине (ӨКМ) караштуу Нарын токой чарбасынын директору У. Ш. кызмат абалынан кыянаттык менен пайдаланып, келишим түзүү жолу менен атасы Б.Ш.га токой фондусунун жалпы аянты 208,7 га жер участогун 45 жылдык мөөнөткө ижарага берген. Ошол эле жылы бул жер тилкесинде У.Ш. тарабынан эч кандай документтери жок үй жана кашар курулган. Андан кийин У.Ш. өзүнүн иш-аракеттерине мыйзамдаштыруу максатында Нарын райондук сотунун төрагасы Э.М. менен кылмыштуу бүтүм түзүп, 2017-жылдын 3-апрелинде турак үйү жана курулмалары бар 356,4 м2 жер участогунун менчик ээси деп таануу жөнүндө соттун чечимин чыгарткан", - деп жазылган.
Шектүү ошондой эле Жер ресурстары, кадастр, геодезия жана картография боюнча мамлекеттик агенттиктин Нарын филиалынын кызматкери Ж.М. менен тил табышып, 1393,57 м2 жерге жеке менчик укугу жөнүндө мамлекеттик акт алганы, бул Нарын райондук сотунун чечиминде көрсөтүлгөн жер тилкесинин өлчөмүнөн бир топ ашып кеткени кошумчаланган.
2024-жылдын 25-октябрында Кылмыш-жаза кодексинин 336-беренеси ("Коррупция") менен козголгон кылмыш ишинин алкагында, У.Ш. жана Ж.М. 27-октябрда Нарын шаардык сотунун чечими менен бир айга камалды.
УКМК козголгон кылмыш ишинин алкагында көрүлгөн чаралардын натыйжасында 208,7 гектарды түзгөн жер тилкеси имараттары жана курулуштары менен бирге мамлекеттин балансына кайтарылганын маалымдады.
Шектүү тараптын жакындары жана алардын адвокаттары комментарий бере элек. (ZKo)
