2025 елда Татарстанда яшь галимнәр өчен торак программасы барлыкка киләчәк. Торак шартларын яхшырту өчен аларның 1 миллион сумнан артык күләмдә субсидия алу мөмкинлеге бар. ТР яшьләр эшләре министры Ринат Садыйков йомгаклау матбугат конференциясендә шулай дип белдерде.
«Киләсе елда Татарстанның яшь галимнәре өчен яңа торак программасы эшли башлый. Ул өч елга исәпләнгән, аңа ел саен 27,5 миллион сум юнәлдереләчәк. Яшь галимнәрнең торак шартларын яхшырту өчен дәүләттән 550 мең сум күләмендә субсидия алу мөмкинлеге бар, без эш бирүченең дә әлеге суммага 550 мең сум өстәвен теләр идек», - дип хәбәр итте министр.
Программаның максаты – перспективалы галимнәрне Татарстанда калдыру. Яшь галимнәр өчен төп критерий – торак шартларын яхшырту кирәклеген раслау, дип сүзен төгәлләде ул.
