2025 елның 1 гыйнварыннан тизлекне сәгатенә 20-40 километрга арттырган өчен штраф күләме – 500 сумнан 750 сумга, машина белән исерек хәлдә идарә иткән өчен 30 меңнән 45 мең сумга кадәр артачак. Бу хакта РИА Новости агентлыгы АИД профессиональ юридик төркеме генераль директоры, юрист Давид Адамска сылтама белән хәбәр итә.
Дәүләт Думасы 12 декабрьдә узган пленар утырышта 2025 елның 1 гыйнварыннан кайбер юл хәрәкәте кагыйдәләрен бозган өчен штрафларны арттыру турындагы закон проектын икенче һәм өченче укылышларда кабул итте. Федерация Советы 20 декабрьдәге утырышта әлеге законны хуплады.
«Штрафларның күбесе, инфляция һәм керемнәрнең артуы фонында актуальлеген югалтып, берничә ел буе үзгәрмәде. Әйтик, тизлекне сәгатенә 20-40 километрга арттырган өчен штраф күләме элегрәк 500 сум тәшкил итте. Яңа елдан ул 750 сумга кадәр артачак», - дип белдерде Адамс.
Юрист фикеренчә, штрафларны арттыру җәза бирүнең искергән системасын яңартуга юнәлдерелгән адым булды һәм ул дәүләтнең аларның саклану нәтиҗәсен көчәйтергә омтылуын күрсәтә.
«Машина белән исерек хәлдә идарә итүгә аерым игътибар бирелгән. Моның өчен штраф күләме 30 меңнән 45 мең сумга кадәр арта. Медицина тикшеренүеннән баш тарткан өчен дә шундый ук штраф яный, бу, асылда, гаепне тануга тигезләшә», - дип өстәде Адамс.
