Фәрит Мөхәммәтшин: Татарстанда мигрантларга ихтыяҗ бар, әмма проблемалар да юк түгел

Татарстан Дәүләт Советы Рәисе Фәрит Мөхәммәтшин республикада мигрантларга ихтыяҗ булуын, әмма алар белән бәйле проблемаларның да көн кадагында торуын әйтте.

«Республикада 100 меңнән артык чит ил гражданы яши, шул исәптән 22 мең студент. 49 меңнән артык чит ил кешесе төрле эштә хезмәт куя. Татарстанга күбесенчә Үзбәкстан, Таҗикстан, Кыргызстан, Казахстан, Беларусь, Азәрбайҗан, Әрмәнстаннан киләләр. Безгә эшче куллар җитми. Әмма бу илләрдән килүчеләрне эре предприятиеләргә алып булмый, анда әзерлекле кадрлар кирәк. Төзелеш мәйданчыклары өчен аларны әле әзерләргә мөмкин», - диде ул журналистларга йомгаклау матбугат очрашуында.

Ул элеккеге Советлар союзы илләреннән килүчеләрнең рус телен белүен, әмма аларның балалары рус телендә сөйләшә алмавын билгеләп үтте. «Шулай булгач, балаларны рус мәктәпләрендә укытыр өчен әзерләргә кирәк. Бу үзе бер зур мәсьәлә», - диде Фәрит Мөхәммәтшин.

Татарстан Дәүләт Советы Рәисе республикада чит ил кешеләренә рус телен өйрәнү өчен шартлар тудырылачак, дип белдерде «Татарстан Рәисе Рөстәм Миңнеханов Татарстан Мәгариф һәм фән министрлыгына тиешле тәкъдимнәр әзерләргә кушты», - диде ул.

Дәүләт Советы Рәисе шулай ук кайбер тармакларда, мәсәлән, мигрантларга таксида эшләргә тыелганлыгына карата үз фикерен әйтте.

«Минемчә, эшләргә дип килгән мигрантларга катгый чикләүләр булмаячак. Рус телен өйрәнгән мигрантларга, әлбәттә, ярдәм булачак. Безнең республикада, нигездә, андый шик-шөбһә юк. Ләкин Татарстанда рус яки татар телләрен белмәсәң, ничек итеп таксист булып эшләргә мөмкин? Кая барасыңны аңлатыр өчен аның белән инглизчә аралашыргамы?» – диде Фәрит Мөхәммәтшин.