Фәрит Мөхәммәтшин: Татарстан парламентара килешү буенча алдынгылар рәтендә

Татарстан Дәүләт Советы Рәисе Фәрит Мөхәммәтшин әйтүенчә, Татарстан хезмәттәшлек турында парламентара килешү төзүчеләр саны буенча Россия төбәкләре арасында алдынгы урында тора.

«Россия Федерациясенең 37 субъекты белән парламентара хезмәттәшлек турында 44 килешү, федераль хакимият органнары белән ике килешү, чит ил партнерлары белән 11 килешү һәм беркетмә төзелде. Бу эш дәвам иттереләчәк. Киләсе елда тагын кайсы чит илләр белән хезмәттәшлек турында парламентара килешүләр төзеп була, шул турыда уйлыйбыз», - дип сөйләде ул журналистларга йомгаклау матбугат очрашуында.

Татарстан Дәүләт Советы Рәисе депутатлар эшчәнлегенең мөһим юнәлеше булып гражданнар мөрәҗәгатьләре белән эш итүне атады. Быел Дәүләт Советы җитәкчелеге һәм комитетлары адресына барлыгы 3248 мөрәҗәгать килгән. «Нигездә, әлеге мөрәҗәгатьләр закон, торак-коммуналь хуҗалык, икътисад, мәгариф, сәламәтлек саклау, социаль яклау өлкәсендәге мәсьәләләрне камилләштерүгә кагыла», - дип ачыклык кертте ул.

«Муниципаль хакимиятләр эшчәнлегенә бәйле сораулар күп. Алар юллар төзү һәм ремонтлауга, су һәм электр белән тәэмин итүгә, чүп-чар чыгаруга кагыла. Бу – көнүзәк мәсьәләләр», - дип билгеләп үтте Дәүләт Советы Рәисе.

Аның сүзләренчә, бер генә мөрәҗәгать тә игътибарсыз калмый, теге яки бу мәсьәлә буенча җаваплы кешегә җибәрелә, контрольгә алына. «Безнең өчен бу бик мөһим. Димәк, кеше, хакимиятнең закон чыгару органына ышанычын күрсәтә, дигән сүз. Бу эш белән без алга таба да җитди итеп шөгыльләнәчәкбез», - диде Фәрит Мөхәммәтшин.

Ул декабрь азагында җиденче чакырылыш ТР Дәүләт Советы эшчәнлегенә йөз көн булганын билгеләп үтте. «Без актив парламентны 40 проценттан артыкка яңартып формалаштыра алдык», - дип йомгаклады Дәүләт Советы спикеры.