Централната изборна комисија на Косово (ЦИК) не ја потврди изборната листа на партијата Српска листа за учество на парламентарните избори на 9 февруари.
Српската листа е најголемата партија на косовските Срби која ја има поддршката од Белград.
Претставниците на владејачката партија, движењето Самоопределување, се спротивставија на верификацијата на оваа партија, велејќи дека не ја признава државата Косово.
Амбасадата на САД во Косово изрази загриженост за „вклучувањето на политички мотивирани критериуми во процесот на сертификација на кандидатите во ЦИК“, бидејќи членовите на таа комисија од Самоопределување Сами Куртеши и Албан Красниќи беа против потврда на Српската листа.
За потврдување на Српската листа гласаше претседателот на Централната изборна комисија Крешник Радониќи, додека останатите членови на ЦИК беа воздржани.
Куртеши рече дека Српската листа никогаш не го ословува Косово со официјалното име - Косово, туку Косово и Метохија. Тој додаде дека оваа партија никогаш не го осудила нападот во Бањска, ниту пак се оградила „од терористичките акти што се случија на Косово“.
Портпаролот на американската амбасада во Приштина изјави дека амбасадата е „длабоко загрижена“ поради постапките на некои членови на Централната изборна комисија да спречат да се потврди кандидатурата на Српската листа.
„Загрижени сме поради очигледното вклучување на политички мотивирани критериуми во процесот на сертифицирање на кандидатите во ЦИК. Ваквите постапки ги прекршуваат основните демократски принципи за слободни и фер избори, бидејќи се отвора вратата за субјективно политичко влијание врз изборниот процес“, изјави за РСЕ портпаролот на амбасадата.
Тој додаде дека дејствијата на ЦИК треба строго да се ограничат на законски стандарди и процедури, а сите одлуки за дисквалификација на кандидатите мора да се засноваат исклучиво на еднаква примена на законот.
