Хәзерге вакытта төп ставка югары булу сәбәпле Татарстанда ипотека кредитларына ихтыяҗ кимү күзәтелә. Әмма бу вакытлы вазгыять, ул берникадәр вакыттан соң җайланачак һәм икътисад яңадан тотрыкланачак. Бу хакта йомгаклау матбугат конференциясендә республика Рәисе Рөстәм Миңнеханов хәбәр итте.
«Без ипотека кредитлары саны 30 процентка кимүне күзәтәбез. Банк ставкасы югары булу аңлашыла, әмма бу вакытлыча, икътисад тотрыкланачак. Тик әлегә төшү күзәтелә, моңа әзер булырга кирәк», - дип билгеләде ул.
Әлеге проблеманы федераль дәрәҗәдә дә аңлыйлар. Россия Президенты Владимир Путин белдерүе нигезендә, гаилә ипотекасы өчен бюджеттан субсидия бүлеп биреләчәк. Бу Россиядә яшәүче гаиләләр өчен мондый төр кредиттан файдалану мөмкинлеген саклау өчен эшләнәчәк.
