Рөстәм Миңнеханов: Киләсе еллар барысы да гаиләгә багышлансын иде
12 сәгатькә сузылган «Яңа ел белән, гаилә!» телемарафоны Татарстан Рәисе Рөстәм Миңнеханов мөрәҗәгате белән төгәлләнде. Ул узып баручы Гаилә елына якынча йомгак ясады. Мөрәҗәгатьне марафонны алып баручылар укыды.
«Кадерле дуслар! Сезне якынлашып килүче 2025 ел белән котлыйм! Россия Президенты Владимир Путин тарафыннан Гаилә елы дип игълан ителгән 2024 ел һәммәбез өчен иң мөһим булган, һәрвакыт безнең күпмилләтле дәүләтебезнең нигезе булып торачак гаиләгә багышланды», – дип искәртте республика җитәкчесе.
«Татарстанда искиткеч гаиләләр яши, алар гореф-гадәтләр белән көчле һәм алар өчен мәңгелек кыйммәтләр: мәхәббәт, кайгырту, өлкәннәргә ихтирам беренче урында тора», – диде ул.
«Республикабыздагы күпбалалы гаиләләр белән горурланабыз, аларның саны елдан-ел арта. 2024 елда мондый гаиләләр 55 меңнән артты, ә 2012 елда алар 24 меңнән аз гына күбрәк булган», – диде Миңнеханов.
«Махсус операциядә катнашучыларның гаиләләренә аерым рәхмәт әйтергә телим. Безнең батыр сугышчыларыбызның кыюлыгы, чыдамлылыгы – барыбыз өчен дә үрнәк. Аларның илебез иминлеге өчен керткән өлешләрен бәяләп бетерү мөмкин түгел», – дип өстәде Татарстан Рәисе.
«Кадерле дуслар! Гаилә елында тормышка ашырылган инициативалар, проектлар, изге эшләр өчен без сезгә рәхмәтле. Киләсе еллар барысы да гаиләгә, якыннарыбызга һәм яраткан кешеләребезгә багышлансын иде», - диде Рөстәм Миңнеханов.