«Абсолют батыр» Булат Мусин телемарафонда әти-әнисе турында сөйләде
Билбау көрәше буенча Россия спортчысы Булат Мусин бүген Татарстанда уза торган «Яңа ел белән, гаилә!» телемарафонында катнашты. Алып баручылар спортчыдан аның өчен кем үрнәк булуы турында кызыксынды.
«Үз әти-әнием миңа үрнәк булып тора. Алар миңа ныклы тәрбия бирде һәм бирешергә ярамаганын, тормыш авырлыкларына һәм төрле киртәләргә дә карамастан алга барырга кирәклеген үз үрнәкләрендә күрсәтте. Бу сыйфатлары минем зур спорттагы уңышларым нигезенә яткандыр», – диде Мусин.
Ул ТНВ студиясенә әти-әнисе – Марат һәм Рәмзия, шулай ук сеңлесе Чулпан белән килгән. Танылган спортчының әнисе Чертуш авылы мәдәният йорты мөдире, әтисе – «Сибирь» НОП тиз реакция төркеме хезмәткәре. Сеңлесе Чулпан алтынчы сыйныфта укый.
30 яшьлек Булат Мусин – көрәшче, 2017 елда Көрәш буенча дөнья кубогы иясе, 2020, 2022 елларда билбау көрәше буенча дөнья чемпионы, Россия чемпионатлары һәм бөтенроссия ярышларында күп тапкырлар җиңүче, көрәш буенча Россия спорт мастеры, Россиянең билбау көрәшче буенча атказанган спорт мастеры. 2024 елда ул Омскида икенче халыкара Иртыш буе Сабан туенда «Абсолют батыр» титулына ия булды.