Түркияда тікұшақ аурухана ғимаратына соғылып, 4 адам қаза болды

Түркияның Мугла қаласында құтқару қызметінің тікұшағы ауруханаға соғылды. Денсаулық сақтау министрлігінің хабарлауынша, төрт адам қаза болған: екі ұшқыш және дәрігер мен оның көмекшісі. Апатқа тұман себеп болуы мүмкін деп айтылады.


Тікұшақ әуеге көтеріліп бара жатып апатқа ұшыраған. Күн ашық болмағандықтан ұшқыштар айналасын дұрыс көре алмаған болуы мүмкін. Тікұшақ көп қабатты аурухананың жоғарғы бөлігіне соғылып, бос алаңға құлаған.




Оқиға орнында өрт сөндірушілер жұмыс істеп жатыр. Полицияның мәліметінше, теракт туралы күдіктенуге негіз жоқ. Түркияның денсаулық сақтау министрлігі қаза болғандардың отбасына көңіл айтты.