Казанда яшәүче Хәбибрахмановлар гаиләсе өч бала: Наил, Җәмил, Алсуны тәрбияләп үстерәләр. Бәхетле гаилә нигезләре турында алар ТНВ-Яңа гасыр телеканалында Гаилә елына багышлап уздырылучы телемарафонда сөйләде.
«Безнең гаиләнең туган көненә быел 22 ел булды. Без бер-беребезне ишетеп белә идек, чөнки әти-әниләр таныш иде. Уйламаганда гына тукталышта очрашып, танышканнан соң, без бер-беребезгә гашыйк булдык», – ди алар.
Хәбибрахмановлар гаиләсе бик иҗади: балаларының барысы да уен коралларында уйный, җырлый һәм актерлык осталыгына өйрәнә. Иҗади гаилә музыкаль бүләк тә әзерләп килгән: алар бергәләшеп «Ай, былбылым» җырын башкардылар.
«Безнең гаилә бәхете – балаларда. Балалар – гаиләнең нуры, безнең киләчәгебез, җимешләребез һәм Аллаһы Тәгалә биргән бүләкләребез.Тормыш булгач, төрлесе була: шатлыгын да, кайгысын да кичерәсең. Һәрвакыт бер-береңне аңлап, күңелеңдә нәрсә икәнен сизеп яшәсәң, һәрбер авырлыкны җиңеп чыгарга була», – ди алар.
Алар Яңа елга нинди ризыклар әзерләүләре турында да әйтеп уздылар. Хуҗабикә сүзләренчә, Яңа ел өстәленә алар һәр ел саен бәлеш һәм каз пешерәләр.
