Қадыров Шешенстанда ажырасқан тағы 57 жұпты "татуластырғанын" айтты
Бұған дейін кейбір азаматтар отбасыны қалпына келтіру жөніндегі республикалық комиссия тарапынан қысымға ұшырағанын айтқан еді.
Қазан айында Шешенстан билігі 2017 жылдың жазынан бері 2 659 жұпты қайта қосқанын мәлімдеген еді. Аймақта Қадыров бекіткен арнайы комиссия жұмыс істейді. Осы деректерді есептесек, 2024 жылы қараша мен желтоқсанда Шешенстанда тағы 57 жұп "татуласқан" болып шығады.
Отырыс барысында Рамзан Қадыров мұндай жұмыс жалғаса беретінін айтқан.
Татуластыру жөніндегі комиссия өз міндетін "көзбояушылықпен" атқарып, азаматтарға қысым жасайды деді аймақтан кеткен теологтардың бірі Кавказ.Реалии сайтына. Оның сөзінше, әйелдер өз балаларын көру үшін ғана "татуласуға" келіседі, себебі әдетте сот кезінде судья балаларды әкелеріне қалдырады. Адвокат Григор Аветисянның айтуынша, Шешенстанда әйелдердің соттасу құқығын мүфтият мен шенеуніктер шектеп тастаған.
2022 жылы Шешенстанда ресми некеде тұрған 9070 жұп ажырасқан, бұл бір жыл бұрынғы көрсеткіштен 2.5 есе көп. Пайыздық қатынас жағынан алғанда Шешенстан бұл тұрғыда Ресейде бірінші орында. Кавказ.Реалии сайты сұраған сарапшылар мен жергілікті тұрғындар бұған билік айтқандай "балгерлер" емес, әлеуметтік-экономикалық мәселелер, сонымен бірге көп әйел алу түрткі екенін айтқан.