د خوړو نړیوال پروګرام په افغانستان کې د ژمي پر وضعیت اندېښنه څرګنده کړې
په افغانستان کې د دغې ادارې مرستیال ویاند ضیاالدین ساپي د ډېسېمبر پر ۲۰مه، له مشال راډیو سره په خبرو کې وویل چې سږکال په افغانستان کې بشري اړتیاوې ډېرې لوړې دي، او د افغانستان یو پر درېیمه برخه وګړي له لوږې سره مخ دي.
ساپي وویل چې د سخت ژمي پر مهال به نږدې ۱۵ میلیونه وګړي مرستو ته اړتیا ولري.
هغه زیاته کړه چې د کار او خوړو د نشتوالي له امله کورنۍ د خپلو کورونو تودولو یا خپلو ماشومانو د تودولو لپاره له سختو انتخابونو سره مخ دي.
تر دې مخکې د ملګرو ملتونو د بشري چارو د همغږۍ ادارې (اوچا) ویلي ول، په ۲۰۲۵ز کال کې به په افغانستان کې بشري مرستو ته د اړو کسانو شمېر ۲۲ اعشاریه ۹ میلیونو ته ورسېږي.
په افغانستان کې د طالبانو حکومت د خوړو نړیوال پروګرام د وروستیو اندېښنو په اړه تر اوسه څه نه دي ویلي.