Чирмешән районы үзәгендәге Яшьләр мәйданчыгында урнаштырылган үзәк чыршының утларын кабыздылар. Яңа елның төп герое Кыш бабай чыршы утларын кабызгач, кунакларны үз резиденциясенә дәште. Бу көнне байтак бала Кыш бабай белән Кар Кызыннан бүләкләр алды. Бу хакта «Безнең Чирмешән» сайтында Кадрия Гамирова яза.
Район халкы һәм кунаклар өчен мондый күңелле бәйрәм быел да нефтьчеләр ярдәме белән оештырылган. Әлеге чарада алар үзләре дә катнашты. Иганәчеләр чыршы янына җыелган халыкны бәйрәм белән котлады, изге теләкләрен җиткерде.
Район башлыгы Рамил Әйбәтов чирмешәнлеләрне якынлашып килүче Яңа ел бәйрәме белән котлады һәм кунакларны биредәге әкияти матурлыкны күрергә чакырды. «Барыгызга да сәламәтлек, һәр гаиләдә, хезмәт коллективларында тынычлык, татулык, бер-береңә хөрмәт булуын телим. Күңелсезлекләр үткәндә калсын, киләсе Елан елы бәхет-шатлыклар алып килсен, уй-хыялларыгыз чынга ашсын», - диде ул.
Мәктәп укучылары арасында оештырылган «Үз кулларың белән ясалган Яңа ел чыршысы патриотик уенчыгы» район конкурсында җиңгән балалар район башлыгы кулыннан бүләкләр дә алды.
Кыш Бабай резиденциясе 23 декабрьдән 8 гыйнварга кадәр һәр көнне 15.00дән 21.00 сәгатькә кадәр эшли. Үз һөнәрен күрсәткән һәр бала нефтьчеләр ярдәме белән әзерләнгән бүләккә ия була.
