Декабрь башында Лисичанскида «Светлячок» балалар бакчасында ягып җылыту системасын торгызу эшләре төгәлләнде, ул ике ел дәвамында эшләмәгән, дип яза «Татар-информ».
2022 елда шәһәр азат ителгәннән соң, җылылык белән тәэмин итү системасы эшләмәгән: балалар бакчасындагы радиаторлар һәм торбалар туңган һәм яраксыз хәлгә килгән. Бу елның салкын вакытында балалар белән эшләүне чикли.
Ул вакытта балалар бакчасы администрациясе ярдәм сорап Татарстан Республикасының Лисичанскидагы вәкиле — вице-премьер Фәнил Әһлиуллинга мөрәҗәгать итә. «Автобусный-Центр Столица» компаниясенең үсеш буенча директоры Андрей Смольяков белән оператив хезмәттәшлек кирәкле материаллар сатып алуны финанслауны тәэмин итәргә һәм җылыту системасын реконструкцияләү эшләрен башкарырга мөмкинлек бирә.
Ике ай дәвамында экспертиза үткәрелде, җиһазлар сатып алынды һәм урнаштырылды. Балалар бакчасында 168 радиаторны алыштырганнар һәм җылылык трассасын, подвалдагы аергычны тулысынча яңартканнар.
«Светлячок» балалар бакчасы җитәкчесе Анжела Ким проблеманы хәл итүдә ярдәм иткән һәркемгә рәхмәт белдерде.
«Бу вакыйга безнең өчен чын бәйрәмгә әверелде. Педагоглар һәм ата-аналар исеменнән без Татарстан Республикасы җитәкчелегенә һәм балалар бакчасында җылылык системасын торгызырга ярдәм иткән эшмәкәрләргә рәхмәт белдерәбез. Хәзер балалар үзләрен уңайлы хис итә һәм бәхетле балачагына шатлана ала», - диде ул.
Хәзер балалар бакчасында актив рәвештә Яңа ел чараларына әзерләнәләр. Анда якынча 80 бала йөри. Ягып җылыту системасын торгызу коллективка һәм ата-аналарга сабыйлар өчен уңайлылык һәм бәйрәм рухы тудырырга мөмкинлек бирде.
