Татарстанда ял көннәрендә бозлы яңгыр, көчле җил һәм буран көтелә
Шимбә, 21 декабрьдә, Татарстанда һава торышы сизелерлек начараю көтелә. Бу хакта Татарстан Гидрометеорология һәм әйләнә-тирә мохитне күзәтү үзәгендә хәбәр иттеләр.
Буран фаразлана, ул вакытта күз күреме 500-1000 метрга кадәр һәм аннан да азракка начарая. Бозлы яңгыр, бозлавык һәм җепшек кар фаразлана. Синоптиклар мәгълүматлары буенча, Казанда һава торышы төнлә һәм иртән начарлана.
Моннан тыш, көньяктан көчле җил чыга, аның тизлеге секундына 15-18 метрга җитә. Юлларда бозлавык барлыкка килергә мөмкин, урыны белән ул көчле була.