Хәрби хезмәттән киткән махсус операция ветераннары «Ватан сакчылары» дәүләт фондына төрле сораулар белән мөрәҗәгать итә. Алар эшләргә, спорт белән шөгыльләнергә һәм мәдәни чараларда катнашырга тели. Россия Президенты Владимир Путин туры элемтә вакытында моңа бик шат булуын белдерде.
«Бу вазгыятьнең яхшыга таба үзгәрүе хакында сөйли, ул сизелә», - диде Путин.
Президент билгеләп үткәнчә, бүген фондның өстенлекле бурычларыннан берсе – махсус операциядән кайткан хәрбиләрне эшкә урнаштыру. «Хәрбиләрне эшкә урнаштыру – мөһим юнәлешләрнең берсе. Аларның күзе янып тора, әзерлек бар. Күпләр шундый әзерлек алырга тели», - диде ул.
Путин шулай ук «Ватан сакчылары» фондын төзү очрашуларның берсендә хәрбиләрнең әниләре җиткергән проблемаларга җавап булды, дип белдерде. Дәүләт башлыгы сүзләренчә, гамәлдәге ярдәм чаралары җитәрлек булып чыкмады һәм яңа фонд хәрби хезмәттән соң социаль һәм башка төрле ярдәмгә мохтаҗ ветераннарга булышуны максат итеп куя.
«Фонд хәрби хезмәттән киткән егетләргә ярдәм итү максатыннан төзелгән, - диде Президент. – Эш һәр кешегә, һәр гаиләгә шәхсән якын килүне таләп итә».
Фондның бурычларына пособиеләр, түләүләр алу, протез кую, укытуны оештыру һ.б. социаль мәсьәләләрне хәл итү керә.
